Míla hefur ráðið tvo nýja stjórnendur. Rebekka Jóelsdóttir er nýr fjármálastjóri hjá Mílu og stýrir fjármálasviði og Snorri Karlsson er framkvæmdastjóri innviðasviðs, sem er nýtt svið hjá Mílu. Snorri hóf störf í vor en Rebekka hefur nýhafið störf. Bæði taka þau sæti í framkvæmdastjórn Mílu.

Rebekka Jóelsdóttir hefur undanfarin 5 ár starfað hjá Marel. Þar stofnaði hún og veitti forstöðu hagdeild Marels. Rebekka hefur víðtæka reynslu af innlendum fjármálamarkaði, en áður starfaði hún sem fjárfestingastjóri hjá Framtakssjóði Íslands og hjá fyrirtækjaráðgjöf Arion banka. Rebekka er viðskiptafræðingur frá Háskólanum í Reykjavík og er með MCF gráðu í fjármálum fyrirtækja. Hún veitir fjármálasviði Mílu forstöðu, sem ber ábyrgð á fjármálahlutanum auk sjálfbærni (ESG) og innkaupum.

Snorri Karlsson kemur til Mílu frá Símanum, þar sem hann gegndi stöðu leiðtoga stafrænnar þjónustu, og þar á undan veitti hann forstöðu þjónustu Símans. Hann hefur starfað í fjarskiptageiranum í meira en 20 ár. Snorri er byggingaverkfræðingur frá Háskóla Íslands, og með meistaragráðu í verkfræði frá Kungliga Tekniska Högskolan í Stokkhólmi. Innviðasviðið sem Snorri stýrir er ný eining hjá Mílu þar sem þeir þættir í rekstrinum sem snúa að uppbyggingu innviða eru sameinaðir, auk öryggis- og gæðamála.

„Þau Rebekka og Snorri styrkja starfsmannahóp Mílu enn frekar. Sérþekking og reynsla þeirra mun nýtast vel í þeim verkefnum sem framundan eru hjá Mílu. Þróun á íslenskum fjarskiptamarkaði er hröð og Míla er þar leiðandi. Fyrirtæki gera lítið án fólks og sterkur hópur eins og sá sem starfar hjá Mílu er forsenda árangurs,“ segir Erik Figueras Torras forstjóri Mílu.