Leikkonan Riley Keough hefur verið útnefnd eini umráðamaður dánarbús móður sinnar, Lisu Marie Presley, og þar með er Keough orðinn eigandi Graceland í Memphis, sem einu sinni var heimili afa hennar, goðsagnarinnar Elvis Presley. 

Móðir Keough, Lisa Marie Presley, sem var einkabarn Elvis og fyrrum eiginkonu hans Priscillu, lést 13. janúar síðastliðinn 54 ára að aldri. Í kjölfarið tók við hörð lagadeila Keough og ömmu hennar um dánarbúið, eftir að Priscilla andmælti erfðaskránni og efaðist um gildi hennar. Í júní síðastliðnum samþykkti hæstiréttur í Los Angeles sátt þeirra á milli. Elvis lést árið 1977 og arfleiddi dóttur sína meðal annars að Graceland.

Samkvæmt sáttinni fær Priscilla leyfi til að vera grafin við hlið Elvis í hugleiðslugarði Graceland, beiðni sem hún lagði fram í maí en var þá hafnað. Keough mun hafa umsjón með sjóði 14 ára hálfsystra sinna Finley og Harper Lockwood, tvíburadætra Lisu Marie frá hjónabandi hennar og Michael Lockwood, en hann staðfestir sáttina sem lögráðamaður dætra sinna. Priscilla verður sérstakur ráðgjafi sjóðsins og fær mánaðarlaun fyrir þann starfa.

Í frétt PageSix kemur fram að talið er að Keough hafi samþykkt að greiða ömmu sinni rúmlega eina milljón dala (rúmlega 132 milljónir króna)  til að verða eini umráðamaður dánarbúsins, auk 400.000 dala (tæplega 53 milljónir króna) vegna lögfræðikostnaðar.

Elvis og Priscilla voru gift árin 1967 til 1973, segist hún ánægð með að lagadeilan við dótturdóttur sína sé leyst og að hinn látni eiginmaður hennar hefði verið ánægður með niðurstöðuna.

Lisa Marie var jörðuð í lok janúar í garðinum við Graceland, þar hvílir jafnframt sonur hennar, Benjamin Keough, sem tók eigið líf árið 2020, 27 ára að aldri, Elvis og foreldrar hans, Vernon og Gladys Presley.