Ræða flugstjóra American Airlines í upphafi flugs þar sem hann hundskammar eigingjarna og dónalega farþega hefur farið sem eldur í sinu um samfélagsmiðla.
Ljóst er að flugstjórinn hefur fengið sig fullsaddan af frekum farþegum. Byrjar hann ræðu sína með orðunum: „Mundu að flugþjónarnir eru fyrst og fremst hér til að tryggja öryggi þitt og því næst til að gera flugið þitt ánægjulegra. Þeir ætla að sjá um ykkur en þið skuluð hlusta á það sem þeir segja, vegna þess að þeirra orð endurspegla mín orð og vilja hér í stjórnklefanum og það er minn vilji sem skiptir máli hér.“
Verður að ítreka grundvallarreglur
Flugstjórinn fór þessu næst yfir nokkrar grundvallarreglur sem ótrúlegt en satt virðist þurfa að minna marga á daglega. „Verið góð við hvert annað, berið virðingu fyrir hvort öðru. Ég ætti ekki að þurfa að segja það. Þið ættuð að koma fram við fólk eins og þið viljið að komið sé fram við ykkur, en ég verð að ítreka þetta í hverju einasta flugi af því margir gera fara ekki eftir þessu. Þeir eru eigingjarnir og dónalegir og við líðum það ekki hér.
Ekki vera fyrir öðrum. Settu farangurinn þinn þar sem hann á að vera, það eru allir búnir að greiða fyrir farangurspláss.
Ekki liggja á öðrum farþegum. Ekki sofna á öðrum farþegum. Ekki láta líða yfir þig á aðra farþega og ekki slefa á aðra farþega nema þið hafið rætt það og þeir séu í vatnsheldum fatnaði,“ segir flugstjórinn sem uppskar hlátur farþega yfir síðustu orðunum.
Það vill enginn hlusta á myndbandið þitt
Flugstjórinn var þó rétt að byrja: „Samfélagstilrauninni að hlusta á myndbönd á hæstu stillingu og tala í farsímann á speaker er lokið. Búið og löngu lokið hér á landi. Það er enginn sem vill hlusta á myndbandið sem þú ert að horfa á. Ég veit að þér finnst það voða krúttlegt og skemmtilegt, sem það er pottþétt, en það er þitt mál. Ekki satt? Þannig að hlustaðu bara einn á það,“ segir flugmaðurinn og ráðleggur farþegum að nota AirPods eða heyrnartól við þetta afhæfi. „Þetta er þitt og bara hluti af því að sýna samferðamönnum sínum virðingu.“
Hin alræmdu miðjusæti
Miðjusætin komu einnig við sögu. „Miðjusætin, ég veit að það er fúlt að sitja í miðjunni. Þið í miðjusætunum, þið eigið báða armpúðana, það er gjöf mín til ykkar.“
Flugmaðurinn lauk svo ræðunni með einföldum hætti: „Velkominn um borð í flugið okkar.“
Farþeginn og grínistinn Anna Leah Maltezos deildi ræðunni á Instagram hjá sér með orðunum: „Takk fyrir að koma á TED fyrirlestur hans.“ Myndbandið hefur fengið yfir 4,4 milljónir áhorfa á rúmri viku.
Og netverjar hafa tjáð sig um ræðuna:
„Hann hefur ekki rangt fyrir sér. Ef hann er að segja þetta þá sýnir það bara að hann er orðinn þreyttur á öllu þessu barnalega fullorðna fólki.“
„Fólkið sem kvartar yfir ræðu hans er fólkið sem þarf að hlusta á ræðuna.“
„Ef þú ert móðgaðst yfir þessari ræðu, til hamingju, þú ert vandamálið.“
Sumum þótti meira að segja svo vænt um ræðuna að þeir vildu greiða flugmanninum bætur fyrir vinnu hans.
„Frábær ræða, flugstjóri. Það hefði átt að klappa fyrir þessu. Bravó vel gert!“
„Ég get gefið Uber bílstjóranum mínum einkunn. Af hverju ekki flugmanninum? Mig langar að gefa þessum gaur 5 stjörnur og ég var ekki einu sinni í þessu flugi!“
„Hann er kominn með nóg af öllu rugli og ég elska það.“
View this post on Instagram
