CNN skýrir frá þessu og segir að vísindamennirnir telji sig hafa fundið sannanir fyrir að stór hluti af jöklinum hafi bráðnað við náttúrulega hlýnun loftslagsins fyrir aðeins 400.000 árum. Þá var hitinn svipaður og sá hiti sem við nálgumst nú með loftslagsbreytingum af mannavöldum.
Þetta eru kannski slæmar fréttir fyrir þá milljarða manna sem búa nærri sjávarsíðunni. „Þegar maður skoðar hvað náttúran gerði í fortíðinni, er það fyrir okkur jarðvísindamenn besta vísbendingin um framtíðina,“ sagði Paul Bierman, hjá University of Vermont og einn af aðalhöfundum rannsóknarinnar.
Rannsóknin var birt í vísindaritinu Science í síðustu viku en hún stóð yfir í mörg ár. Hún snerist um 3,5 metra langt jarðvegssýni sem var tekið eftir að borað hafði verið 1.300 metra niður undir ís við bandarísku Camp Century herstöðina á Grænlandi.
Á þessum tíma var tæknin ekki nægilega góð til að hægt væri að rannsaka sýnið vel. En 2017 fannst það í dönskum frysti og var tekið til rannsóknar. Það var Paul Biermen sem fann sýnið.
Þegar vísindamenn við University of Vermont byrjuðu að rannsaka sýnið urðu þeir mjög hissa. „Jarðvísindamönnum bregður venjulega ekki við það sem þeir finna, en þetta er virkilega sjokkerandi,“ sagði Bierman að sögn CNN.
Í sýninu eru leifar af greinum, mosa, laufblöðum og fræjum. Með sérstakri tækni var rannsakað hvenær þessar leifar voru síðast í sólarljósi. Kom þá í ljós að þær lentu undir ís fyrir aðeins 416.000 árum.
„Við erum hér með steinrunnið, frosið vistkerfi. Það þýðir auðvitað að jökullinn var horfinn því þú gast ekki ræktað plöntur undir kílómetra þykkum ís,“ sagði Bierman.
Vísindamennirnir segja að þetta sanni að stór hluti af Grænlandsjökli hafi horfið þegar loftslagið hlýnaði fyrir mörg hundruð þúsund árum síðan. Þeir segja að þetta bendi til að Grænlandsjökull geti hafa bráðnað frekar hratt þegar loftslagið hlýnaði af náttúrulegum orsökum. Af þeim sökum geti ísinn verið „enn viðkvæmari fyrir loftslagsbreytingum af mannavöldum en áður var talið og geti verið viðkvæmur fyrir óafturkallanlegri, hraðri bráðnun á næstu öldum,“ segir í tilkynningu frá þeim.
Eins og staðan er núna er CO2 í andrúmsloftinu hálfu öðru sinni meira en var þegar jarðvegssýnið lenti undir ís.
Ef ísinn á Norður- og Suðurskautinu bráðnar meira en reiknað er með, getur það gert slæma stöðu enn verri fyrir þann hluta mannkyns sem býr við sjávarsíðuna. „Við erum að tala um margra metra hækkun sjávarborðsins, líklega tugi metra. Ef við horfum á hæð New York City, Boston, Miami og Amsterdam yfir sjávarmáli. Sjáið Indland og Afríku, þar sem flestar byggðirnar eru nærri sjónum,“ sagði Tammy Rittenour, hjá Utan State University og einn af höfundum rannsóknarinnar.
