Illugi Jökulsson er allt annað en sáttur með starfshætti Icelandair en flugfélaginu tókst að týna farangri dóttur hans, Veru Illugadóttur, og vinkonu hennar þegar þær flugu frá Nuuk, höfuðborg Grænlands, til Keflavíkur í gær.

Illugi birtir mynd af flugstöðinni í Nuuk og bendir á að það sé allnokkuð afrek að týna töskum flugfarþega í smárri byggingu sem þjónustar 19 þúsund manna samfélagi. Ennfremur hafi aðeins þrettán farþegar verið um borð í flugvélinni til Íslands.

„Töskurnar hafa ekki fundist þótt nú sé einn og hálfur sólarhringur síðan. Við höfum náð sambandi við starfsmenn Icelandair, sem eru ósköp kurteisir en það virðist þó ekkert hægt að gera til að finna töskurnar. Þær stöllur eiga bara að bíða þangað til eitthvað gerist sem enginn veit hvað er. Getur verið svo flókið mál fyrir eitt öflugt og gamalgróið flugfélag að fara fram á að starfsfólk í Nuuk leiti að og finni tvær töskur í ekki stærri flughöfn?!,“ spyr Illugi undrandi.