Katrín Middleton, prinsessa af Wales og hertogaynja af Cornwall og Cambridge, var á meðal fjölmargra frægra gesta á tennismóti karla sem fram fór á Wimbledon um liðna helgi. 

Á myndum frá mótinu má sjá að hún hittir Bond-leikarann Daniel Craig og leikkonuna Rachel Weisz og á við þau gott spjall, en leikarnir sátu í sérstakri stúku sem frátekin er fyrir konungsfjölskylduna og gesti hennar (e. Royal Box). Má sjá Craig halda hönd Katrínar í sinni og heilsa henni með vingjarnlegum hætti.

Netverjar hafa sumir hneykslast á því að leikararnir hafi verið of kumpánlegir við hertogaynjuna og ekki heilsað henni samkvæmt konunglegum siðareglum. Katrín hefur þó verið þekkt fyrir það áður að láta reglurnar ekkert trufla sig.

Ritstjóri Daily Mail, Richard Eden, gagnrýnir framkomu leikarana í færslu á Instagram: „Þessi mynd truflar mig. Það var kannski ekki pláss fyrir Weisz og Craig til að hneigja sig, en gátu þau í það minnsta ekki staðið upp þegar þau heilsuðu prinsessunni af Wales? Og gat Craig ekki tekið niður sólgleraugun?“

Höfuðhneiging og hneiging eru talin merki um virðingu þegar einstaklingur hittir meðlim konungsfjölskyldunnar, en slíkt er þó ekki skylda. Á vefsíðu konungsfjölskyldunnar má sjá siðareglurnar og kemur þar fram að margir kjósi að hneigja sig þegar þeir hitta konunglega meðlimi. Karlmenn hneigi höfuð sitt, meðan konur beygja sig lítt í hnjánum. Aðrir kjósi þó að heilsa með hefðbundnum hætti með handabandi.

Bond-leikarinn góðkunni er þó kannski ekki eins og almúginn, hann hefur lengi átt gott samband við koungsfjölskylduna, hefur boðið þeim á tökustaði mynda sinna, var nýlega gerður meðlimur í reglu St. Michael and St. George og árið 2012 lék hann í stuttmynd ásamt Elísabetu Englandsdrottningu sem sýnd var á opnunarhátíð Olympíuleikana í London. 

Katrín afhenti bikara til gull- og silfurverðlaunahafa mótsins og má sjá Carlos Alcaraz og Novak Djokovic hneigja sig áður en þeir taka við verðlaununum frá hertogaynjunni. Allt til ársins 2003 var það regla að keppendur á Wimbledon mótinu áttu að ganga inn á völlinn, snúa sér að konunglegu stúkunni og hneigja sig, síðan var þeirri reglu breytt að aðeins skyldi hneigja ef Elísabet drottning og/eða sonur hennar og næstur í krúnuröðinni Karl Bretaprins (nú konungur) sætu í stúkunni. Keppendur hneigðu sig þó ekki í ár fyrir Karli og eiginkonu hans Camillu.

Ef almenningi finnst þessar siðareglur furðulegar í nútímanum þá er jafnvel enn furðulegra að meðlimir konungsfjölskyldunnar hneigja sig fyrir hver öðrum, enn það á reyndar aðallega við þegar langt er síðan viðkomandi hittust síðast. Þessi siðaregla er eitt af mörgum sem Meghan Markle furðaði sig á þegar samband hennar og Harry fyrrum Bretaprins hófst. Þegar hún rifjaði atvikið upp í Netflix þættinum Harry og Meghan sagði hún:

„Ég man þegar við vorum í bílnum og vorum að keyra upp að höllinni þá segir Harry: „Þú kannt að hneigja þig er það ekki?“ Og ég hélt að þetta væri grín. Hvernig útskýrir þú þetta fyrir fólki? Hvernig útskýrir þú það að þú átt að hneigja þig fyrir ömmu þinni og þú þarf að hneigja þig? Sérstaklega fyrir bandaríkjamanni. Þetta er skrýtið.“