Þau hafa verið hjón í rúmlega tvo áratugi en bæði eru þau 59 ára. Þau bjuggu á Long Island.
Daily Mail skýrir frá því að Ása hafi sótt um skilnað frá Rex í bær hjá Suffolk County Supreme Court í New York og hafi sést með dóttur sinni Victoria, sem er 26 ára, í verslun í gær. Hún hafði ekki sést opinberlega síðan Rex var handtekinn.
Eins og fram hefur komið í fyrri umfjöllunum DV þá hefur Rex verið kærður fyrir að hafa myrt þrjár vændiskonur árið 2010. Talið er að hann sé hinn alræmdi Gilgo-strandar raðmorðinginn. Reiknað er með að hann verði fljótlega kærður fyrir fjórða morðið en talið er að Gilgo-strandar raðmorðinginn hafi myrt allt að 10 konur.
Rodney Harrison, lögreglustjóri í Suffolk County, sagði að Ása og börnin hennar tvö séu full „viðbjóðs“ og „skammar“ yfir handtöku Rex. Hann sagðist telja að þau hafi ekki vitað um ódæðisverk hans.
Robert Macedonia, lögmaður Ásu, sagði í samtali við Daily Mail að lögreglan hafi fengið húsleitarheimild hjá fjölskyldunni daginn sem Rex var handtekinn á Manhattan. „Henni var mjög brugðið og það sama á við um börnin þeirra tvö. Lífi þeirra hefur verið umturnað,“ sagði hann.
Þegar hann var spurður hvort Ása hafi vitað af meintum glæpum eiginmannsins var svarið: „No comment.“ (Ég tjái mig ekki um það).
Eins og fram hefur komið í fjölmiðlum þá var Ása að heiman þegar konurnar þrjár voru myrtar. Gögn um ferðir hennar sýna fram á að hún var meðal annars á Íslandi þegar ein konan var myrt.
Nágrannar segja að hjónin hafi sjaldan sést saman. Fram hefur komið að Rex á tvö hús til viðbótar við það sem þau búa í á Long Island. Eitt í Las Vegas og eitt í Kaliforníu. Lögreglan er nú að rannsaka hvort hann tengist hugsanlega morðum á þessum svæðum.
Ása og Rex héldu sig mikið út af fyrir sig og nágrannar segjast ekki muna eftir að fólki hafi verið boðið heim til þeirra.
