Mirror í Bretlandi ræðir í dag við ástralskan mann að nafni James Swanwick. Hann segist hafa drukkið það magn af áfengi á hverjum degi sem þykir nokkuð eðlilegt, a.m.k. í áströlsku samfélagi. Hann ákvað hins vegar að prófa að hætta að drekka áfengi í 30 daga og á þeim tíma léttist hann um 6 kíló. Kílóunum tapaði hann við það að kviðfita minnkaði en það þykir einkar erfitt að ná af sér kviðfitu með líkamsrækt.

Swanwick tók þessa ákvörðun 13. mars 2010 og að 30 dögunum liðnum ákvað hann að halda bindindinu áfram og hefur ekki drukkið áfengi síðan. Hann heldur úti vefsíðunni Alcohol Free Lifestyle sem sérhæfir sig í aðstoð við einstaklinga sem njóta velgengni í starfi en eiga í vandræðum með áfengisdrykkju.

Hann segir það hafa komið sér mjög á óvart hversu hratt hann léttist þegar hann ákvað að prófa að hætta að drekka áfengi.

Swanwick segir að í ástralskri drykkjumenningu sé það félagslega samþykkt að drekka nokkur vínglös með kvöldmatnum á virkum dögum og þó nokkuð af köldum bjór um helgar. Hann fylgdi þessu mynstri til að falla í hópinn og hafa gaman. Það leit ekki út fyrir að hann ætti við vandamál að stríða.

Þegar nokkuð var liðið á fertugsaldurinn var hann hins vegar orðinn sljórri og pirraðri. Andlitið var þrútið og hann átti í vandræðum með svefn. Hann fór á A.A fund en komst að þeirri niðurstöðu að hann gæti ekki talist vera alkóhólisti.

Þegar hann var staddur í Bandaríkjunum fór hann snemma að morgni á pönnukökustað og ætlaði að fá sér mikinn morgunverð til að losna við timburmennina eftir mikla drykkjunótt. Myndir á veggjum staðarins af fitugum mat vöktu hins vegar ógleði hjá honum. Þá tók hann ákvörðunina um að prófa að sleppa áfengi í 30 daga til að ögra sjálfum sér.

Hann segir vini sína hafa strítt sér og sagt að hann gæti varla verið ástralskur. Fyrstu tvær vikurnar voru erfiðastar en hann fór að sofa betur, leið almennt betur og varð skýrari í kollinum. Að 30 dögunum liðnum voru kílóin sex fokin en hann gerði ekkert annað til viðbótar við að sleppa áfengi. Swanwick varð orkumeiri, átti meiri peninga og húðin leit betur út.

Árangurinn fyllti hann svo miklu sjálfstrausti að hann sótti um starf sem íþróttafréttamaður og fékk það. Að einu ári liðnu án áfengis hafði hann lést um 11, 3 kíló og stofnaði til nýrra vináttusambanda og gekk líka betur þegar kom að rómantíkinni.

Síðan þá hefur hann kennt þúsundum manna að lifa áfengislausu lífi.