Í tilkynningu frá Úlfari Lúðvíkssyni, lögreglustjóranum á Suðurnesjum, segir að Meradalaleið að yfirstandandi eldgosi á Reykjanesskaga sé nú opin.
Í tilkynningunni segir enn fremur að Ríkislögreglustjóri lýsi yfir almannavarnastigi í samráði við viðkomandi lögreglustjóra.
Við upphaf eldgossins við fjallið Litla Hrút 10. júlí sl. lýsti Ríkislögreglustjóri yfir hættustigi. Segir í tilkynningunni að það hafi verið gert með hliðsjón af alvarleika atburða og þörf á nauðsynlegum viðbúnaði viðbragðsaðila.
Hættustund hefst þegar hættustigi eða neyðarstigi almannavarna er lýst yfir og lýkur þegar hættustigi eða neyðarstigi er aflýst.
Á hættustundu virkist valdheimildir sem kveðið er á um í lögum um almannavarnir. Á hættustundu sé lögreglustjóra heimilt að ákveða að taka í sínar hendur umferðarstjórn, banna dvöl eða umferð á ákveðnum svæðum svo sem með því að girða af eða hindra umferð um þau, þ.m.t. tilteknar fasteignir, taka í sínar vörslur hættulega muni, vísa á brott eða fjarlægja fólk. Fyrirmælum þessum sé öllum skylt að hlíta.
Slökkvistarf vegna gróðurelda á svæðinu heldur áfram en talið er óhætt að hleypa fólki inn á Meradalaleið. Lögregla, landverðir og björgunarsveitir verða á svæðinu en lögð er áhersla á að fólk fari ekki inn á skilgreint hættusvæði.
Það er ákvörðun lögreglustjórans á Suðurnesjum að banna dvöl eða umferð almennings á skilgreindu hættusvæði samkvæmt meðfylgjandi korti.
Meðfylgjandi kort sýnir gönguleiðir og skilgreint hættusvæði að mati Veðurstofu Íslands.
Spá veðurvaktar Veðurstofu Íslands um gasdreifingu:
Norðan og norðvestan 5-8 m/s, en bætir heldur í vind síðdegis á morgun. Lægir seint annað kvöld. Gasmengunin berst til suðurs og má því búast við að hennar verði vart á Suðurstrandarvegi og á gönguleiðum að gosstöðvunum.
