Það er mikil reiði innan herbúða West Ham út í Arsenal vegna tafa á yfirvofandi kaupum á Declan Rice.

Það eru tíu dagar síðan West Ham samþykkti tilboð Arsenal í enska miðjumanninn upp á 100 milljónir punda auk 5 milljóna í árangurstengdar greiðslur síðar meir.

Breska götublaðið The Sun segir að lögmenn Arsenal eigi enn eftir að gefa grænt ljós á samning Rice við félagið þrátt fyrir að langt sé síðan hann samdi um kaup og kjör. Hann hefur einnig þegar gengist undir læknisskoðun.

Hjá West Ham eru menn brjálaðir og ekki hrifnir af því hvernig vinnubrögð Arsenal hafa verið í viðræðunum yfirhöfuð.

West Ham hefur ekkert gert á leikmannamarkaðnum í sumar en félagið bíður eftir brottför Rice áður en það fer að eyða pening í leikmenn.

Hamrarnir hafa líklega misst af skotmarki sínu Harvey Barnes til Newcastle og þá hafa þeir áhyggjur af því að missa af Joao Palinha einnig.

Sem stendur æfir Rice einn í Portúgal en Arteta vonast til að hann verði formlega orðinn leikmaður liðsins áður en það heldur til Bandaríkjanna í æfingaferð á sunnudag.