Umræðan um vopnavæðingu lögreglunnar og auknar valdheimildir hennar hefur verið hávær undanfarin misseri. Ekki síst í kjölfar þess að yfirvöld fjárfestu duglega í vopnabúri lögreglu í aðdraganda leiðtogafunds Evrópuráðsins sem fram fór hérlendis um miðjan maí síðastliðinn. Sitt sýnist hverjum um þá ráðstöfun og hafa meðal annars ýmsir gagnrýnt að lögreglan hafi verið vígbúin nánast í skjóli nætur án þess að nokkur umræða hafi farið fram.

Þórgnýr Thoroddsen, fyrrum borgarfulltrúi Pírata, er einn þeirra sem er ósáttur við vígbúnaðinn. Hann birti neðangreinda mynd á Facebook-síðu sinni nú fyrir stundu, þar sjá má vopnaðan lögreglumann kaupa sér nesti, og spyr hvort að ekki sé hægt að sammælast um það að laganna verðir séu ekki með byssur á sér við slík erindi.

„Pæling. Nú skil ég alveg að það sé hugsanlega sniðugt að lögreglufólk hafi aðgengi að skotvopnum í aðstæðum sem þess krefjast. Getum við, sem samfélag, samt sammælst um að lögreglan þurfi ekki að bera skammbyssur þegar þau fara í Nettó að kaupa sér Skyr? Þetta er alvarlega fokkað!“