Í tilkynningu frá Lögreglunni á Suðurnesjum kemur að síðastliðinn laugardag, 1. júlí, hafi leit að Sigrúnu Arngrímsdóttur verið framhaldið. Sigrúnar hefur verið saknað síðan helgina 9. til 11. júní. Björgunarsveitir gengu fjörur á sunnanverðum Reykjanesskaga. Við leitina var notast við dróna. Segir í tilkynningunni að leitaraðgerðir hafi ekki borið árangur.

Upphaflega var lýst eftir Sigrúnu þann 13. júní síðastliðinn eftir að tilkynning barst lögreglu um yfirgefna bifreið á bifreiðastæði sunnan við Suðurstrandarveg, nærri Húshólma. Þrátt fyrir umfangsmiklar leitaraðgerðir björgunarsveita dagana eftir tilkynninguna, bar leit ekki árangur.

Lögreglan ítrekar að ef einhver telur sig búa yfir upplýsingum um ferðir Sigrúnar er viðkomandi beðinn um að hafa samband við lögregluna á Suðurnesjum í síma 444-2299 eða við Neyðarlínuna 112.