Aðdáendur tónlistarmanna gera hvað sem er til að bera goð sitt augum á tónleikum, þar á meðal að skrópa í vinnunni. Einn aðdáenda bandarísku söngkonunnar Taylor Swift gerði akkúrat það. Aðdáandinn sem búsettur er í Cincinnati í Bandaríkjunum tilkynnti sig veika í vinnuna á fimmtudag til að geta mætt með þeim fyrstu í röð til að kaupa varning sem í boði var fyrir tónleika söngkonunnar á laugardag.

Til að koma í veg fyrir að þekkjast þá dulbjó aðdáandinn sig með eftirtektarverðum hætti, svo að vinnuveitandinn kæmist ekki á snoðir um að starfsmaðurinn væri í röð í stað þess að liggja heima veikur. Aðdáandinn virðist hafa sótt innblástur dulargervisins í myndband Swift Anti-Hero. 

Myndband af aðdáandanum eldheita hefur vakið mikla kátínu meðal netverja, en eins og sjá er hann með teppi yfir höfðinu og sólgleraugu þar yfir. Í viðtali við WKRC kemur fram að í röðinni var annar einstaklingur sem einnig hafði skrópað í vinnunni þennan dag. „Hér eru tveir Swifties, sem við munum ekki segja deili á, þar sem báðir tilkynntu sig veika í vinnuna í dag,“ segir fréttakonan og bætir við að báðir hafi ferðast frá Cincinnati til Louisville og beðið í röð yfir nóttina með von um að ná að kaupa einhver varning merktan tónleikaferðalaginu.

Tónleikaferðalag Swift, Eras Tour, hefur slegið í gegn vestanhafs og segjast fræðingar ekki hafa séð aðrar eins vinsældir síðan Bítlarnir heimsóttu Bandaríkin fyrir áratugum síðan. Allir tónleikar eru uppseldir og má sjá fjölda aðdáenda söngkonunnar mæta fyrir utan tónleikastaðina, miðalausa í þeirri von að geta þó allavega sungið með í fjarlægð. Fregnir bárust af einum aðdáenda sem réð sig sem öryggisvörð eftir að hafa misst af miðakaupum.