Íþróttavikan er á dagskrá alla föstudaga hér á 433 og í Sjónvarpi Símans. Þeir Helgi Fannar Sigurðsson og Hrafnkell Freyr Ágústsson fá til sín góða gesti og í þetta skiptið mætti Adam Ægir Pálsson, leikmaður Vals.

Adam lék með Keflavík í fyrra á láni frá Víkingi R. og lék hann einnig með félaginu 2019 og 2020, sem og í 2. flokki.

Liðið er nú á botni Bestu deildarinnar og hefur gengið afar illa. Var Adam spurður út í stöðuna hjá sínu gamla félagi.

„Þetta er ekki gott eins og staðan er núna. En það er ekki hægt að búa til nýtt lið á hverju einasta ári. Það er erfitt að ná þessum leikmönnum sem eru númer 13-14 í Keflavík til að vera með metnaðinn til að ná lengra.

Lykilatriðið er að fá góða leikmenn í glugganum. Ég vona að stjórnin standi við bakið á Sigga og kaupi leikmenn. Þá hef ég alveg trú á þessu,“ sagði Adam.

Hrafnkell benti á leikmannamissi Keflavíkur í vetur.

„Þeir misstu 7-8 lykilmenn. Þetta er mjög óeðlilegt og á ekkert að gerast hjá neinum klúbbi.“

Adam tók til máls á ný.

„Ég reyndi að segja það við Sigga (Sigurð Ragnar Eyjólfsson) í fyrra, það á ekki að vera svona mikill munur á bestu liðunum og Keflavík í umgjörð, metnaði á æfingum og slíku. Það er ekki hægt að halda í við þessi lið ef þú ætlar alltaf að vera nokkrum skrefum eftir á í þessu.

Í fyrra voru þeir til dæmis ekki með styrktarþjálfara í fullu starfi. 2023 verður þú að vera með það og ég veit að þeir eru búnir að ráða einn núna. Þú getur ekki alltaf verið með bestu leikmennina, þeir fara í bestu liðin. En þú getur verið með allt til staðar til að geta sagt við næsta leikmann sem kemur inn að þú hafir það sem þurfi til að bæta hann. Ef þú ert ekki með það heldur er það mjög erfitt.“

Umræðan í heild er í spilaranum.