Rio Ferdinand er pirraður á sínu gamla félagi, Manchester United, vegna meðferðarinnar á markverðinum David De Gea.

Samningur Spánverjans er að renna út á miðnætti og hefur ekki tekist að endursemja.

Félagið bauð honum samning þar sem markvörðurinn hefði þurft að taka á sig mikla launalækkun frá þeim 375 þúsund pundum á viku sem hann er á núna og samþykkti De Gea það. Að lokum vildi United hins vegar ekki skrifa undir samninginn og vildi að hann lækkaði laun sín enn frekar.

Var De Gea pirraður á þessu.

Erik ten Hag er talinn vilja nýjan markvörð og er Andre Onana sterklega orðaður við félagið.

„Þetta er skondin staða. Hvort sem þú telur að David De Gea sé nógu góður fyrir Manchester United í dag er matsatriði. En hann hefur verið frábær þjónn fyrir félagið. Hann hefur verið hér í tólf ár og oft verið valinn leikmaður ársins. Hann er ótrúlegur atvinnumaður,“ segir Ferdinand.

„Það eru margir sem vilja að hann fari og það er allt í lagi. En ég er mjög hissa á hvernig félagið hefur staðið að þessu. Þetta snýst allt um samskipti og mér finnst fleiri og fleiri leikmenn fara á slæmm nótum og mér finnst það ekki rétt eða sanngjarnt fyrir leikmanninn.“