Stefán Ingi Sigurðarson, framherji Breiðabliks, er sagður á leið til Patro Eisden í belgísku B-deildinni. Óskar Hrafn Þorvaldsson, þjálfari Blika, ræddi málið við 433.is í dag.

Óskar fór yfir komandi verkefni Blika gegn Buducnost í forkeppni Meistaradeildar Evrópu á morgun og var spurður út í framtíð Stefáns í leiðinni. Hefur hún verið á allra vörum en líklega er kappinn á leið til Belgíu.

„Ég get bara sagt það sem hefur verið sagt. Það eru viðræður í gangi. Ég bara átta mig ekki á hvort þeim sé lokið eða ekki. Stebbi spilar á morgun og lengra hugsum við ekki. Svo bara gerist það sem gerist,“ segir Óskar við 433.is.

Fari Stefán út mun Óskar samgleðjast honum.

„Hann er búinn að standa sig frábærlega og ef hann fer út munu allir geta glaðst yfir því. Hann á allt gott skilið. Hvenær eða hvort hann fer, ég bara veit það ekki. Ég er bara að þjálfa liðið. Ég er ekki á skrifstofunni að sjá um þessi mál.“

En munu Blikar styrkja sig ef fer sem horfir og Stefán heldur til Belgíu?

„Það verður bara að koma í ljós. Fyrst þurfum við að sjá hvort hann fari og svo þarf að skoða það. Það þyrfti þá að vera réttur leikmaður sem passar okkur og bætir liðið, ekki einhvern sem er góður upp á breiddina. Hann þarf að hafa áhrif og hjálpa okkur. Það er ekki auðvelt að finna slíkan leikmann.“

Viðtalið við Óskar í heild er í spilaranum.