Nýtt fyrirtæki, Apparatus, hefur verið stofnað um hönnun og þróun applausna fyrir íslenskan markað. Hið nýja félag er systurfyrirtæki vefstofunnar Vettvangs og er í eigu sömu aðila, Elmars Gunnarssonar og Garðars Þorsteinssonar. Auk þeirra starfa hjá Apparatusi reynslumiklir forritarar og hönnuðir.

Elmar og Garðar segjast hafa fundið rækilega fyrir hinni hröðu þróun í stafrænni tækni á undanförnum árum. Krafa neytenda um fyrsta flokks þjónustu og sjálfsafgreiðslu í gegnum stafræna miðla verður sífellt meiri, sem helst í hendur við hraða þróun í veflausnum og farsímatækni. Apparatus tekur á loft af krafti, en meðal fyrstu viðskiptavina sem þegar eru með öpp í þróun má nefna Lyfju og Atlantsolíu.

„Stofnun Apparatus er rökrétt næsta skref fyrir okkur, enda finnum fyrir mikilli eftirspurn eftir þróun applausna um þessar mundir. Við erum þegar með mjög metnaðarfull verkefni í þróun fyrir aðila eins og Atlantsolíu og Lyfju,“ segir Elmar.

„Hönnun fyrir símaviðmót fylgir eigin lögmálum, en þó erum við í grunninn alltaf að smíða lausnir sem eru hámarkaðar fyrir notendur, kröfur þeirra og þarfir sem breytast hratt. Sérstaða okkar hjá Apparatusi er hve náið við vinnum með samstarfsaðilum okkar. Við gefum okkur þann tíma sem þarf til að kynnast fyrirtækjunum, starfsemi þeirra og væntingum viðskiptavina þeirra,“ segir Elmar ennfremur.

Jón Kári Eldon, hönnunarstjóri Apparatus, segir að tækniþróun í applausnum hafi verið mjög hröð á síðustu árum. „Í dag er raunhæft fyrir flesta að gefa út sitt eigið app sem hefur ýmsa kosti fram yfir venjulegt vefviðmót á farsímum. Áður var slíkt bara á færi stærstu fyrirtækja. Tæknin heimilar okkur að gefa út öpp þvert á Apple/Android markaðina. Það einfaldar leikinn auðvitað til muna,“ segir hann.