Leikkonan og grínistinn Roseanne Barr hefur valdið usla vegna ummæla sem hún lét falla í nýlegum hlaðvarpsþætti. Roseanne var gestur hlaðvarpsstjórnandans Theo Von en í þættinum afneitaði hún helför gyðinga og bætti svo við að sex milljónir gyðinga ættu að deyja nú þegar því að þeir ættu sök á öllum vandamálum heimsins.

Óhætt er að segja að ummælin hafi fallið í grýttan jarðveg en sonur Roseanne hefur varið móður sína og sagt að hún hafi látið orðin falla í kaldhæðni.

Roseanne, sem er sjálf af gyðingaættum, var að ræða um meint kosningasvindl í bandarísku forsetakosningunum um árið þegar hún lét ummælin falla. „36 fylki geta gefið þér 81 milljón atkvæða. Það er staðreynd,“ sagði Roseanne og vísað þar í atkvæðafjöldann sem Joe Biden hlaut þegar hann vann forsetakosningarnar.

Þáttastjórnandinn Theo Von spurði hana þá hvort að ekki hafi verið svindlað í kosningunum.

„Að sjálfsögðu ekki. 36 fylki eru með 81 milljón atkvæða. Skiluru? Það er sannleikurinn. Og ekki voga þér að mótmæla því af því að þá verður lokað á þig á Youtube. Facebook og Twitter,“ sagði Roseanne og bætti við:

„Og enginn lést í helförinni. Það er sannleikurinn. En það ætti að gerast. Sex milljónir gyðinga ættu að deyja nú þegar því þeir bera ábyrgð á öllum vandamálum heimsins en það gerðist aldrei,“ sagði leikkonan.

Hvort sem um var að ræða tilraun til kaldhæðni eða ekki þá hafa ummælin valdið talsverðum usla og reiði á samfélagsmiðlum ytra og telja margir að Roseanne hafi þarna farið yfir einhverja línu.

Þetta er ekki í fyrsta skiptið sem Roseanne er sökuð um slíkt en árið 2018 sendi hún frá sér tíst þar sem hún líkti ráðgjafa Barack Obama, Valerie Jarett, sem er dökkur á hörund, við apa.