Viktor Benóný Benediktsson, leikari og samfélagsmiðlastjarna, er mikill aðdáandi knattspyrnugoðsagnarinnar Cristiano Ronaldo. Hann gekk lengra en flestir til að hitta á kappann er hann var staddur hér á landi á dögunum með portúgalska landsliðinu.
Það fór ekki framhjá neinum hér á landi þegar Ronaldo mætti ásamt portúgalska landsliðinu til að keppa við það íslenska í undankeppni EM 2024 í síðustu viku.
Fjöldi manns flykktist til að mynda að Grand Hótel þar sem Ronaldo og félagar dvöldu daginn fyrir leikinn við Ísland. Færri tóku þó upp á því að panta sér gistingu á hótelinu. Það gerði hinn 17 ára gamli Viktor hins vegar og greiddi 50 þúsund krónur fyrir.
„Það var ekkert annað í boði en að splæsa 50 þúsund kalli í þetta,“ segir Viktor í samtali við DV, en hann er gríðarlega mikill aðdáandi Ronaldo.
„Ég held með Manchester United og Real Madrid út af Ronaldo,“ bætir hann við, en Viktor var sjálfur lengi í fótbolta. „Þá var maður einmitt mikið að herma eftir Ronaldo.“
Undanfarin ár hefur hann hins vegar getið sér gott orð í leiklist. Lék hann til að mynda í kvikmyndunum Berdreymi og Víti í Vestmannaeyjum. Þá er Viktor virkur á samfélagsmiðlunum Tiktok og Instagram, en hann birti einmitt myndband af því þegar hann hitti Ronaldo á miðlum sínum.
Viktor sér alls ekki eftir því að hafa eytt 50 þúsund krónum í hótelgistingu á sama hóteli og Ronaldo. „Það var rosalega skemmtilegt að vera á sama hóteli og vita af honum fyrir neðan sig,“ segir hann léttur.
Viktor hitti Ronaldo á hótelinu en segir viðbrögð sín ekki hafa verið eins og hann hafði búist við. „Það var mjög gaman að hitta hann og ég hafði gullið tækifæri til að knúsa hann, fá eiginhandaráritun eða eitthvað. En raddböndin fóru bara og ég fraus.“
Leikurinn sjálfur fór 0-1 fyrir Portúgal og skoraði Ronaldo sigurmarkið í blálokin. Grátlegt fyrir okkur Íslendinga. Einhverjir tóku þó upp á því að fagna markinu. Þrátt fyrir að vera mikill aðdáandi Ronaldo dregur Viktor línuna þar.
„Það er nefnilega málið. Það er fyrst Ísland og svo Ronaldo,“ segir Viktor Benóný Benediktsson léttur í bragði við DV.
Hér að neðan má sjá myndband Viktors sem hefur vakið mikla athygli
View this post on Instagram
