Titilvörn Breiðabliks er nánast orðin að engu eftir tap gegn HK í Kórnum í kvöld. Heimamenn unnu sanngjarnan sigur 5-2 sigur og eru með sex stig gegn Blikum í sumar.

HK komst í þrígang yfir í leiknum en tveir fyrrum Blikar, þeir Atli Hrafn Andrason og Arnþór Ari Atlason voru á skotskónum.

Eftir tapið eru Blikar sjö stigum á eftir toppliði Víkings sem eiga leik til góða. Blikar hafa tapað tveimur leikjum gegn HK, einum leik gegn ÍBV og gert jafntefli gegn Keflavík. 11 stig töpuð gegn liðum í neðri hluta deildarinnar.

Það er öllu bjarta yfir FH sem er nú aðeins þremur stigum á eftir Blikum sem sitja í þriðja sæti og á liðið leik til góða. FH var að berjast við fall á síðustu leiktíð en vann Fram 4-0 í kvöld þar sem Úlfur Ágúst Björnsson skoraði tvö.

Keflavík bjargaði svo stigi gegn Fylki á heimavelli þar sem Edon Osmani jafnaði leikinn. Keflavík er þremur stigum á eftir Fram sem er í tíunda sæti deildarinnar.

HK 5 – 2 Breiðablik
1-0 Örvar Eggertsson
1-1 Stefán Ingi Sigurðarson
2-1 Atli Hrafn Andrason
3-1 Arnþór Ari Atlason
3-2 Stefán Ingi Sigurðarson
4-2 Atli Arnarson
5-2 Brynjar Snær Pálsson

FH 4 – 0 Fram
1-0 Úlfur Ágúst Björnsson
2-0 Úlfur Ágúst Björnsson
3-0 Kjartan Kári Halldórsson
4-0 Kjartan Henry Finnbogason

Keflavík 1 – 1 Fylkir
0-1 Pétur Bjarnason
1-1 Edon Osmani