Íþróttavikan kemur út á 433.is og í Sjónvarpi Símans alla föstudaga. Þar fá þeir Helgi Fannar Sigurðsson og Hrafnkell Freyr Ágústsson til sín góða gesti og í þetta skiptið mætti Þorgerður Katrín Gunnarsdóttir til þeirra félaga.

KSÍ hefur lýst yfir áhyggjum af aðstöðuleysi í ljósi þess að íslenska karlalandsliðið mun líklega spila umspilsleik um sæti á EM 2024 í mars. Ólíklegt er að hægt sé að treysta á Laugardalsvöllinn þá.

„Mér finnst þetta eiginlega algjörlega óskiljanlegt, að þetta sé ekki löngu komið. Það er nokkuð síðan við sáum fram á að það væri hugsanlegt að það væri umspil. Við áttum að vera búin að byggja upp þannig stefnu að þetta verði hægt.

Þessu verður bjargað. Ég held að engin ríkisstjórn eða ráðherra íþróttamála muni þola það ef eitthvað íslenskt landslið spilar á erlendri grundu,“ sagði Þorgerður ákveðin.

Hrafnkell var spurður út í það hvort hann myndi vilja fara með leikinn til Kaupmannahafnar eða Tenerife.

„Ég held ég myndi fara til Köben. Það er líka svo mikið af Íslendingum þar sem við myndum fá með okkur,“ svaraði Hrafnkell léttur.

Þorgerður tók til máls. „Að heyra ykkur tala um þetta, að fara til Danmerkur. Þvílík niðurlæging.“

Umræðan í heild er í spilaranum.