Gísli Jökull Gíslason, rannsóknarlögreglumaður og fræðimaður, spyr í færslu á Facebook-síðu sinni hvers virði mannslíf er.

Hann minnir á að 14. júní síðastliðinn hafi báturinn Messina, sem var fullur af flóttamönnum sokkið undan ströndum Grikklands. Alls hafi 82 fundist látnir en talið sé mjög líklegt að sú tala eigi eftir að hækka til muna og jafnvel fara upp í rúmlega 500. Flóttafólkið hafi hvert og eitt borgað andvirði 1,1 milljón íslenskra króna fyrir ferðina. Gríska strandgæslan, sjóherinn og bátar í einkaeigu hafi tekið þátt í leitar- og björgunaraðgerðum.

Gísli ber svo þessa leit saman við leitina að kafbátinum Titan sem er í eigu fyrirtæksins Oceangate og sigldi með nokkra milljarðamæringa niður að flaki farþegaskipsins Titanic í Norður-Atlantshafi

Sjá einnig: Einn ríkasti maður Pakistan um borð í týnda kafbátnum ásamt syni sínum – 50 klukkustundir til stefnu

Súrefnið talið uppurið í kafbátnum – Þetta er fólkið um borð og stjúpsonurinn sem kom af stað hatursbylgju

Hann bendir nöfn þeirra fimm einstaklinga sem um borð eru hafi verið gefin upp og af þeim séu þrír milljarðamæringar sem hafi hver greitt andvirði 34,7 milljóna íslenskra króna fyrir ferðina. Bæði bandaríski herinn og strandgæslan auk sjóhers og strandgæslu Kanada taki þátt í leitinni og noti til þess nýjustu tækni.

Gísli Jökull bætir því svo við í athugasemdum undir færslunni að augljóst sé að staða og uppruni fólks skipti máli þegar kemur að hversu mikið er lagt í leit að því. Allir í kafbátnum séu nafngreindir en flóttafólkið deyi nafnlaust og gleymt.