Eins og alþjóð veit tapaði íslenska karlalandsliðið fyrir því portúgalska í undankeppni EM 2024 í gær. Tapið var grátlegt og Strákarnir okkar stóðu sig frábærlega.

Hinn magnaði Cristiano Ronaldo skoraði eina markið í blálokin – og það í sínum 200. landsleik.

Portúgalskir miðlar fjölluðu vel um það sem gekk á og var ákveðinn samhljómur í umfjöllun þeirra. Íslenska kvöldsólin vakti greinilega athygli Portúgala og þá var mikið komið inn á að um „týpíska frammistöðu í lok tímabils“ hafi verið að ræða hjá Ronaldo og félögum.

„Undir eilífu sólinni á þessum tíma árs í Reykjavík var þetta týpískur, slappur leikur undir lok tímabils. Leikur á 20. júní hljómar ansi vel, en eftir 11 mánaða strembið tímabil voru menn dauðþreyttir. Cristiano Ronaldo átti ekki sína bestu frammistöðu en hann er samt aðalsöguhetjan. Metin elta hann,“ segir í Tribuna.

Sapo Desporto tók í svipaðan streng. „Þetta var týpískur leikur í lok tímabils. Þetta var erfitt og menn voru þreyttir. Það vantaði að skapa meira og lítið var um færi hjá báðum liðum. En Portúgal sigraði. Þetta var fjórði sigurinn í jafnmörgum leikjum og hefur liðið ekki enn fengið á sig mark. Þetta var erfiðasti leikurinn hingað til en ef til vill var þetta þess vegna sætasti sigurinn, vegna þess hvernig hann vannst.“

Publico gagnrýndi portúgalska liðið.

„Bruno Fernandes fann ekki taktinn og líkamleg geta Bernardo Silva er einskis nýtt í svona fótboltaleik. Ronaldo átti að taka við fyrirgjöfum en niðurstaðan var alltaf sú sama: Slagur við íslensku skrímslin sem elska skallaeinvígi. Þetta var afar slakur leikur frá Ronaldo. Hann var eins og eyja frammi með enga aðstoð. Mark hans breytir ekki hversu lélegur hann var.“

Fyrirsögn A Bola vakti svo hvað mesta athygli. „Sólin skín líka á kvöldin fyrir stjörnur eins og Ronaldo.“