Rio Ferdinand, fyrrum leikmaður Manchester United og enska landsliðsins, hefur tjáð sig um óhugnanlega reynslu sem hann og aðrir leikmenn Englands upplifðu eftir HM 2006 í Þýskalandi.

England var á heimleið eftir tap gegn Portúgal í 8-liða úrslitum en flugvélin lenti í gríðarlega slæmu veðri og var óttast að hún myndi hrapa.

Stórstjörnur voru innanborðs sem og fjölskyldur leikmannana en Ferdinand var um tíma búinn að sætta sig við eigin dauða.

Sem betur fer þá komst flugvélin á áfangastað í heilu lagi en um er að ræða augnablik sem enginn af þessum aðilum mun gleyma.

,,Það var nýbúið að slá okkur úr keppni í 8-liða úrslitum HM og við upplifðum versta flug sem þú getur ímyndað þér. Veðrið var skelfilegt og við héldum allir að við myndum hrapa til jarðar. Við hágrétum,“ sagði Ferdinand.

,,Ég sat við hlið Wayne Rooney og Steven Gerrard og þeirra eiginkonum og allir voru öskrandi. Þetta var ókyrrð á öðru stigi. Þetta var klikkun, farangurinn flaug út um allt og enginn vissi hvað væri í gangi.“

,,Ég hélt klárlega að þetta væri endirinn, sérstaklega þegar ég horfði á starsfólk vélarinnar. Þú veist alltaf hversu alvarleg staðan er ef þú horfir á þeirra viðbrögð. Ég vissi að við værum í miklum vanda.“

,,Ég er yfirleitt nokkuð rólegur en þegar ég horfði á þeirra viðbrögð þá varð ég eins hræddur og ég hef verið.“