Íslenska karlalandsliðið er í vondum málum í undankeppni EM eftir leik við Slóvakíu á Laugardalsvelli í kvöld.

Um var að ræða þriðja leik Íslands í riðlakeppninni en áður var leikið við Bosníu og Liechtenstein.

Leikurinn gegn Bosníu tapaðist 3-0 en í kjölfarið unnum við Liechtenstein sannfærandi 7-0 á útivelli.

Leikur kvöldsins tapaðist 2-1 og ræddi Rúnar Alex Rúnarsson, markmaður Íslands, um viðureignina stuttu eftir lokaflautið.

,,Allir voru svekktir og fúlir að hafa ekki unnið þennan leik eða fengið eitthvað út úr þessum leik. Þetta var mikilvægur leikur og það voru allir meðvitaðir um það og allir eru gríðarlega svekktir,“ sagði Rúnar.

,,Við eigum fjögur eða fimm dauðafæri á fyrstu 10 mínútunum og ef við setjum eitt eða tvö mörk þar þá myndast meira pláss fyrir okkur að spila í en í staðinn verður leikmyndin önnur þegar þeir skora og við þurfum að elta. Svona er fótboltinn stundum.“

,,Við vorum með völdin í fyrri hálfleik. Við vorum óhræddir við að keyra á þá og svo í seinni hálfleik dettum við of langt niður og verjumst of langt niðri og þeir spila sig inn í leikinn.“

,,Nú þurfum við að sækja stig gegn Portúgal á þriðjudag sem við vissum fyrir að væri erfitt en það er skylda að fá eitthvað úr þeim leik. Sem betur fer eigum við ennþá fjóra heimaleiki eftir og við eigum eftir að fara út til Lúxemborg. Þetta var fyrsti leikur með nýjum þjálfara og nýjum pælingum þannig þetta er enginn heimsendir en svekkjandi.“