Bandaríski herinn sendi fyrr í vikunni sveit F-22 herþota til Mið-Austurlanda vegna áhyggja af glæfralegri og ófagmannlegri hegðun rússneskra herflugmanna á svæðinu.

Samkvæmt frétt CNN sagði Michael Kurilla, einn æðsti hershöfðingi Bandaríkjahers, í tilkynningu að glæfraleg og ófagmannleg hegðun rússnesku flugmannanna sé eitthvað sem ekki sé að búast við frá opinberum flugher. Segir hann Rússana hafa reglulega brotið umsamdar reglur um aðgerðir til að draga úr möguleikum á átökum eða mistökum milli bandarískra og rússneskra herþota á svæðinu. Sagði hershöfðinginn Bandaríkjaher og bandamenn hans staðráðinn í að auka öryggi og stöðugleika í Mið-Austulöndum.

Var herþotunum beint til Mið-Austurlanda frá herstöðvum í Evrópu.

Fram kemur hjá CNN að árásargirni rússneskra herþota á svæðinu hafi farið vaxandi undanfarin misseri. Komið hafa upp mörg atvik þar sem bandarískar og rússneskar herþotur hafa mæst á flugi og þá einna helst í lofthelgi Sýrlands. Í apríl síðastliðnum gerðu rússneskir herflugmenn margar tilraunir til að egna bandarískum kollegum sínum til átaka yfir Sýrlandi.

Talsmaður flughers Bandaríkjamanna segir að glæfraskapur og ófagmanneska rússneskra flugmanna í Mið-Asuturlöndum hafi aukist til muna undanfarið ár. Þar áður hafi yfirmenn rússneskra hersveita í Sýrlandi verið miklu tilbúnari til að fylgja umsömdum ferlum við að draga úr líkum á átökum.