Real Madrid staðfesti fyrr í dag komu Jude Bellingham til félagins frá Borussia Dortmund. Þetta hefur legið í loftinu.
Spænska blaðið Marca segir frá því að Bellingham muni þéna 12 milljónir punda í árslaun eða 1 milljón punda á mánuði. Í fótbolta er oftast talað um vikulaun og eru þau um 250 þúsund pund á viku fyrir Bellingham.
Flestir bjuggust við því að Bellingham yrði á hærri launum en 2,1 milljarður í laun fyrir ungan dreng ætti þó að duga.
Hinn 19 ára gamli Bellingham gerir sex ára samning við Real Madrid. Gæti hann kostað félagið allt að 115 milljónir punda.
Bellingham hefur verið á mála hjá Dortmund síðan 2020 en hann kom frá Birmingham. Hann hefur farið gjörsamlega á kostum síðan þá.
Þá átti miðjumaðurinn frábært HM með enska landsliðinu í fyrra sem var ekki til að minnka áhugann á honum.
Fjöldi stórliða hafði áhuga en Real Madrid hafði að lokum betur.
