Dómur var kveðinn upp yfir manni í Héraðsdómi Reykjavíkur þann 1. júní vegna nokkurra brota og kveður þar helst að annars vegar misferli með bensínlykil og hins vegar ógnvekjandi textaskilaboðum.

Maðurinn var sakaður um að hafa stolið bensínlykli í desember árið 2020 og notað lykilinn óspart í nokkra daga. Tók hann út bensín fyrir samtals 41.725 krónur.

Á svipuðu tímabili er hann sakaður um að hafa send konu mörg ógnverkjandi skilaboð þar sem hann hótaði henni og unnusta hennar ofbeldis. Eftirfarandi skilaboð eru tilgreind í dómnum:

„Ég buffa þig og þennan drulludela“

„Þú helvítis tussa ég bíð eftir ykkur“

,,Stúta smettinu á honum“

,,Ég bíð eftir þér hóra, drep hann“

,,Stúta honum“

„Þú þarna egóistinn þinn ég rústa þér“

Segir í ákæru að ummælin hafi verið til þess fallin að vekja konunni ótta um líf sitt og unnusta hennar, heilbrigði og velferð þeirra.

Maðurinn játaði brot sín fyrir dómi. Var hann dæmdur í fimm mánaða fangelsi og til að greiða konunni sem hann hótaði 150 þúsund krónur í miskabætur.