Fjölmargir ferðamenn nota vefinn Tripadvisor á ferðalögum sínum til að finna meðmæli með veitingastöðum, stöðum sem vert er að skoða og upplifunum, í þeirri borg eða landi sem þeir eru staddir hverju sinni.
Notendur geta gefið einkunnir og umsagnir og þannig raðast veitingastaðir og staðir upp í röð eftir einkunnunum. Það getur því skipt veitingastaði töluverðu máli að vera ofarlega á listanum og slæmar umsagnir, þó þær séu fáar, geta lækkað einkunnina verulega.
DV hefur í mörg ár fylgst með listanum þegar kemur að veitingastöðum borgarinnar. Í nóvember í fyrra tókum við saman lista yfir þá tíu besta og langaði okkur því að kanna svona þegar aðeins er liðið á þetta kuldalega sumar hvort staðirnir fyrir sjö mánuðum væru enn á topp tíu listanum.
Svona leit listinn út 19. nóvember 2022:
Og svona lítur hann út í dag:
Arabískur skyndibiti enn á toppnum
Veitingastaðurinn Arabian Taste, sem býður upp á sýrlenskan og arabískan skyndibita eins shawarma, falafel og döner-kebab, heldur toppsætinu. Staðurinn opnaði í ársbyrjun 2022 á Laugavegi 87 og hefur hann slegið í gegn bæði hjá erlendum ferðamönnum sem flestir fara um Laugaveginn og einnig hjá heimamönnum. Samandregið þykir maturinn vera afar bragðgóður, gerður úr gæðahráefnum og þá þykir verðlagið afar hagstætt.
Staðurinn er með 494 umsagnir, sem flestar gefa fimm stig. Nær umsagnir gefa staðnum hræðilega umsögn (e. terrible) og snýr önnur þeirra að því að viðkomandi fékk pöntunina rangt afgreidda og hin bendir á að um er að ræða skyndibitastað.Eigandi staðarins er duglegur að svara umsögnum og staðurinn þykir bjóða upp á góðan mat á góðu verði, vingjarnlegt starfsfólk og góða þjónustu.
Besti maturinn fannst á nepölskum veitingastað
Í öðru sæti er nepalski veitingastaðurinn Himalayan Spice, sem opnaði árið 2018. Staðurinn er sá eini í höfuðborginni sem býður upp á nepalska matargerð og þar má meðal annars fá einn vinsælasta disk Nepals, Dumplings. Matseðillinn er fjölbreyttur og meðal annars hægt að fá lamb, tígrisrækjur, kjúkling, fisk og ýmsa grænmetisrétti, svo eitthvað sé upp talið. 464 umsagnir um staðinn eru flestar afar lofsamlegar og segir einn umsagnaraðili „besti maturinn í ferðinni.“
Léleg einkunn sökum skorts á íslenskum matseðlum
Mama Reykjavík fellur niður um eitt sæti á listanum í þriðja sæti, en staðurinn opnaði í júní 2020 á Laugavegi 2. Staðurinn er vegan veitingstaður sem býður upp á súpur, salöt og ýmiss konar góðgæti. Mama Reykjavík heldur einnig tónleika, fyrirlestra og viðburði sem tengjast heilsu og andlegum málefnum. 132 umsagnir um staðinn eru nær allar jákvæðar, ein íslensk kona gefur staðnum lélega einkunn sökum þess að allir matseðlar og upplýsingar eru aðeins á ensku og spyr sig hvers heimamenn eigi að gjalda.
Hefðbundinn íslenskur matur í fjórða sæti
Efsti veitingastaðurinn á lista sem býður upp á „fine dining“, er í fjórða sæti listans, Reykjavík Kitchen á Rauðarárstíg 8. Staðurinn sem er fjölskyldurekinn opnaði september 2018 og er að hluta í eigu sömu fjölskyldu og rekur Old Iceland sem er í 5. Sæti listans. Eins og nafnið bendir til þá býður staðurinn upp á hefðbundinn íslenskan mat og íslenskt hráefni. Á matseðlinum er kjötsúpa, sjávarréttarsúpa, þorskur, lax, lamb og naut svo aðeins fátt sé talið. Umsagnir eru 1195 og nær allar lofsamlegar.
Fáir fínni staðir á topp tíu listanum
Athygli vekur að það eru fáir fínni veitingastaðir (e fine dining) á topp tíu listanum, þeir eru aðeins fjórir sem flokkast þar undir: Reykjavík Kitchen, Old Iceland Restaurant, Lóa Restaurant og Fiskfélagið. Sumir myndu jafnvel segja að aðeins sá síðasttaldi falli í þann flokk.
Einnig vekur athygli blaðamanns að aðeins einn staður á topp tíu listanum ber íslenskt nafn, Fiskfélagið. Lógó staðarins inniheldur þó bæði íslenska nafnið og þýðingu þess yfir á ensku.
