Íþróttavikan kemur út alla föstudaga á 433.is, Hringbraut.is og í Sjónvarpi Símans. Helgi Fannar Sigurðsson og Hrafnkell Freyr Ágústsson fá þar til sín góða gesti. Í þetta sinn sat landsliðsmaðurinn Jóhann Berg Guðmundsson með þeim.

Age Hareide er tekinn við íslenska landsliðinu og hefur stýrt nokkrum æfingum fyrir komandi leiki gegn Slóvakíu og Portúgal.

„Hann veit nákvæmlega hvernig hann vill spila. Hann er með ákveðnar hugmyndir um hvernig við getum fundið glufur í vörn andstæðinganna og hvað við getum gert. Svo er hann mikill karakter. Þegar hann talar þá hlusta menn og gera það sem hann segir. Hann hefur gert þetta allt áður og af hverju ætti maður ekki að hlusta á hann?“

Jóhann var spurður út í muninn á Hareide og Lars Lagerback.

„Við erum ekkert að fara aftur í 4-4-2 og negla honum löngum eins og áður fyrr. Við erum heldur ekki með leikmenn í það. Við vorum með ótrúlega framherja sem við gátum neglt upp á. Við erum með öðruvísi leikmenn núna sem við þurfum að nýta.“

Hareide, heimsótti Jóhann á Englandi þegar tímabilið með Burnley var í fullum gangi.

„Hann sagði mér hvað hann vildi fá frá mér í landsliðinu og öðrum. Það er frábært þegar landsliðsþjálfarinn gerir sér ferð til að hitta þig og spjalla saman.“

Jóhann og Hareide tóku þá rúnt saman.

„Ég þurfti að skutla kallinum upp á hótel. Ég brunaði niður hraðbrautina og með hann upp á hótel.“

Umræðan í heild er í spilaranum.