Rúnar Alex Rúnarsson segir íslenska landsliðsmenn gera sér fulla grein fyrir mikilvægi leiksins gegn Slóvakíu í undankeppni EM 2024 eftir rúma viku. Hann ræddi við 433.is fyrir æfingu í Laugardalnum í dag.

Ísland hefur hingað til tapað gegn Bosníu og gert jafntefli við Liechtenstein í undanriðlinum.

„Þetta er rosalega mikilvægur leikur fyrir okkur ef við viljum vera með í baráttunni um að komast á EM til loka,“ segir Rúnar.

Markvörðurinn segir nýjan landsliðsþjálfara, Age Hareide, ekki komið með miklar áherslubreytingar hingað til.

„Hann mun breyta einhverju og laga eitthvað. Enn sem komið er hafa þetta verið skemmtilegar æfingar en við förum örugglega í meiri taktík og ég leyfi mér að segja leiðinlegri æfingar í næstu viku.“

Rúnar er á mála hjá enska stórliðinu Arsenal en hefur verið lánaður út undanfarin tvö tímabil. Hann var hjá Alanyaspor í Tyrklandi í vetur.

„Ég er mjög ánægður með tímabilið, spilaði alla leiki og gekk vel. Við bjuggumst kannski við meiru sem lið en persónulega er ég mjög ánægður með þetta.

Ég er búinn að því (að ræða við Arsenal) en það er enn óljóst hvað verður. Ég ætla að einbeita mér að landsleikjunum núna og reyna svo að fá einhver svör. Það gæti breyst fram í júlí/ágúst en ég nenni ekki að eyða orku í það núna.“