Það fóru tveir leikir fram í Lengjudeild karla í kvöld.
Hörkuleikur var spilaður í Egilshöllinni þar sem Fjölnir tók á móti Gróttu.
Pétur Theodór Árnason kom Gróttu yfir snemma leiks en skömmu fyrir lok fyrri hálfleiks jafnaði Axel Freyr Harðarson fyrir heimamenn.
Gestirnir komust yfir að nýju á 54. mínútu þegar hinn 16 ára gamli Tómas Jóhannessen skoraði.
Skömmu síðar svaraði Máni Austmann Hilmarsson hins vegar með marki fyrir Fjölni.
Meira var ekki skorað. Lokatölur 2-2. Fjölnir er á toppi deildarinnar með 14 stig, stigi meira en Afturelding sem á leik til góða. Grótta er í sjötta sæti með 7 stig.
Á sama tíma gerðu Njarðvík og Selfoss einnig jafntefli suður með sjó.
Guðmundur Tyrfingsson kom Selfyssingum yfir eftir rúman stundarfjórðung en þegar um fimm mínútur lifðu venjulegs leiktíma jafnaði Luqman Hakim fyrir heimamenn. Þar við sat, lokatölur 1-1.
Selfoss er í fjórða sæti deildarinnar með 10 stig en Njarðvík í því sjöunda með 6 stig.
