Íslenska karlalandsliðið er komið saman til æfinga fyrir komandi leiki í undankeppni EM 2024. Sævar Atli Magnússon er brattur fyrir verkefninu.

Ísland mætir Slóvakíu þann 17. júní og Portúgal 20. júní.

„Andinn er mjög góður og við erum rosalega spenntir,“ segir Sævar við 433.is.

Sævar steig sín fyrstu skref í landsliðinu fyrr á þessu ári undir stjórn Arnars Þórs Viðarssonar og var eðlilega glaður að fá kallið frá nýjum þjálfara, Åge Hareide.

„Ég var mjög sáttur. Ég er búinn að standa mig þokkalega og veit að hann hefur fylgst vel með mér.

Þetta er ákveðinn draumur að rætast að spila hér á Laugardalsvelli.“

Sævar líst vel á Hareide.

„Hann er rosalega fagmannlegur. Hann kann þetta og er strax byrjaður að nefna það sem við getum gert til að meiða Slóvaka, særa þá.“

Sævar og félagar í Lyngby héldu sér á lygilegan hátt í dönsku úrvalsdeildinni um síðustu helgi. Það var vel fagnað.

„Ég náði mér niður í gær í fyrsta skiptið þegar ég kom hingað á æfingu. Það voru mikil fagnaðarlæti, skiljanlega, þetta var ótrúlegt afrek. Það voru margir sem prjónuðu yfir sig. Þetta var ótrúlega gaman.“