Árni Johnsen, fyrrverandi alþingismaður, lést í gær á Heilbrigðisstofnun Suðurlands í Vestmannaeyjum, 79 ára að aldri.
Frá þessu er greint í Morgunblaðinu.
Árni fæddist í Vestmannaeyjum 1. mars 1944. Foreldrar hans voru Poul C. Kanélas frá Detroit í Bandaríkjunum og Ingibjörg Á. Johnsen kaupakona. Hún átti síðar Bjarnhéðin Elíasson skipstjóra og útgerðarmann í Vestmannaeyjum, að því er segir á vef Alþingis.
Árni ólst upp í Eyjum og gekk þar hefðbundna skólagöngu. Hann var kennari í Eyjum 1964 til 1965 og í Reykjavík veturinn 1966-1967 eftir að hafa tekið próf frá Kennaraháskóla Íslands 1966. Hann starfaði hjá Surtseyjarfélaginu með aðsetur í Surtsey sumar og haust 1966 og 1967 og var blaðamaður á Morgunblaðinu 1967-1991. Þá var hann dagskrárgerðarmaður við Ríkisútvarpið og við Sjónvarpið frá stofnun þess.
Árni var Sjálfstæðismaður og þingmaður Suðurlands 1983–1987, 1991–2001 og Suðurkjördæmis 2007–2013. Þá var hann varaþingmaður Suðurlands febrúar–mars 1988, nóvember 1989, mars–apríl 1990, janúar–febrúar 1991.
Árni skráði viðtalsbækur og bækur um gamanmál þingmanna, samdi sönglög og stjórnaði brekkusöngnum á Þjóðhátíðinni í Vestmannaeyjum um árabil. Þá var hann mikill talsmaður þess að hefja framkvæmdir á göngum frá meginlandinu og til Vestmannaeyja.
Eftirlifandi eiginkona Árna er Halldóra Filippusdóttir. Þau áttu soninn Breka, sem féll frá árið 2018, en fyrir átti Árni tvær dætur með fyrrverandi eiginkonu sinni, Margréti Oddsdóttur. Þær heita Helga Brá og Þórunn Dögg.
