Sveindís Jane Jónsdóttir, landsliðskona og leikmaður Wolfsburg, mun í dag spila úrslitaleik Meistaradeildar Evrópu gegn Barcelona. Hún er ansi spennt fyrir komandi verkefni.

„Stemningin er góð. Ég er ógeðslega spennt og get ekki beðið eftir að spila þennan leik,“ segir Sveindís í viðtali við Íþróttavikuna hér á 433.is.

Barcelona þykir sigurstranglegra liðið fyrir leik.

„Við erum vel stemmdar og vitum að öll pressan er á Barcelona. Þær fóru í úrslitaleik í fyrra og pressan er á þeim.“

Wolfsburg missti af Þýskalandsmeistaratitlinum til Bayern Munchen um síðustu helgi. Setur það meira blóð á tennurnar fyrir úrslitaleik Meistaradeildarinnar?

„Já, hundrað prósent. Það var leiðinlegt að vinna ekki deildina en ef við vinnum Meistaradeildina er mér alveg sama um hana.“

Sveindís hefur spilað fyrir tugþúsundir manna í Meistaradeildarleikjum undanfarin tímabil en kippir sér ekki of mikið upp við það.

Horfðu á þáttinn í heild hérna

„Fyrir mér eru þetta bara venjulegir leikir. Þetta er eins og að spila hvern annan leik. En það er bónus að það sé fullur völlur og að það sé orðið normið í kvennaboltanum er bara geggjað.“

Það á búast við fleiri stuðningsmönnum Wolfsburg en Barcelona í Eindhoven, þar sem leikurinn fer fram.

„Það er bara 40 mínútna flug svo þetta er svolítið okkar heimavöllur.“

Ítarlega er rætt við Sveindísi í spilaranum. Þar má einnig sjá almenna umræðu um leikinn í dag úr Íþróttavikunni.