Alls hafa 302 manns hafa skráð sig í árlegt inntökupróf í læknisfræði og sjúkraþjálfunarfræði við Læknadeild Háskóla Íslands sem fram fer 8. og 9. júní á háskólasvæðinu. Umsækjendur um nám í tannlækningum þreyta nú í fyrsta sinn inntökuprófið en þar sækjast 41 eftir inngöngu. Samanlagður fjöldi sem þreytir inntökuprófið er því 343.

Samtals taka 238 inntökupróf í læknisfræði og 64 í sjúkraþjálfunarfræði. Fjöldi þeirra sem veitt er innganga í læknisfræði og sjúkraþjálfun miðast við afkastagetu sjúkrahúsanna við verklega þjálfun nemenda. Í læknisfræði verða teknir inn 60 nemendur og 35 nemendur í sjúkraþjálfunarfræði.

Í framhaldi af samþykkt háskólaráðs fyrr á þessu ári þreyta nú umsækjendur um nám í tannlækningum í fyrsta sinn sama inntökupróf og þau sem sækja um nám í læknisfræði og sjúkraþjálfunarfræði. Allt að 40 nemendum verður boðið að hefja nám í tannlækningum í haust. Í desember fara svo fram samkeppnispróf eins og áður og 8 nemendum verður boðið að hefja nám á vorönn.

Athygli vekur að í tannlækningum þreyta 41 inntökupróf og allt að 40 verður gefinn kostur á að hefja nám í haust. Samkvæmt upplýsingum frá Háskóla Íslands er það þó ekki svo að hleypa eigi inn öllum nema einum. Umsækjendur um nám í tannlækningum hafa verið mun fleiri undanfarin ár og var það ástæða þess að háskólaráð samþykkti að láta umsækjendur þreyta inntökupróf læknadeildar.

Óvíst er að 40 manns verði boðið að hefja nám við Tannlæknadeild þar sem ná þarf tiltekinni lágmarkseinkunn í tilteknum prófhlutum til að standast prófið.

Inntökuprófið fer fram í nokkrum byggingum Háskólans og þreyta allir þátttakendur prófið í prófakerfinu Inspera og geta ýmist nýtt eigin tölvur eða tölvur sem Háskóli Íslands lánar þeim til próftöku. Þetta er í annað sinn sem slíkt fyrirkomulag er viðhaft. Inntökuprófið tekur tvo daga líkt og áður og í því eru sex tveggja tíma próflotur.

Þess má geta að þau sem fara í prófið en fá ekki inngöngu geta skráð sig í aðrar deildir Háskóla Íslands eftir að niðurstöður hafa verið birtar.