„Þessi maður rústaði lífi dóttur minnar. Hann skal fá makleg málagjöld. Hann braut mörg hundruð sinnum gegn henni á viðbjóðslegan hátt. Það sem hann gerði er ófyrirgefanlegt,“ sagði faðir unglingsstúlku í viðtali við DV þann 4. janúar á þessu ári.
„Hann braut mörg hundruð sinnum gegn henni,“ sagði faðirinn ennfremur, en maðurinn sem hann ásakar um þessa hræðílegu glæpi er Reykvíkingur á fimmtugsaldri með hreint sakavottorð. Faðirinn er ekki einn um að saka manninn um glæpi því héraðssaksóknari ákærði hann í febrúar en rannsókn lögreglu á málinu hafði þá staðið lengi yfir.
Hinn ákærði er fyrrverandi stjúpfaðir stúlkunnar en hann er sakaður um að hafa brotið ítrekað á henni kynferðislega í fjögur ár, frá því hún var 9 ára og fram til 13 ára aldurs. Meðal gagna í málinu er ítarleg skýrsla frá Barnahúsi en þar lýsti stúlkan hinum meintu brotum í mörgum viðtölum við sálfræðinga. Sérfræðingar Barnahúss meta framburð hennar mjög trúverðugan.
Í ákæru er maðurinn sakaður um kynferðisbrot gegn barni og stórfellt brot í nánu sambandi, með því að hafa á tímabilinu 2016 – 2019, á heimili sínu, misnotað freklega yfirburðarstöðu sína gegn stúlkunnni, traust hennar og trúnað sem stjúpfaðir og endurtekið og á alvarlegan hátt ógnað heilsu og velferð hennar með því að hafa í ótilgreindan fjölda skipta með ólögmætri nauðung misnotað hana kynferðislega á margvíslegan hátt sem tilgreindur er með ítarlegum hætti í ákærunni. Er þar um að ræða mjög grófar lýsingar.
Hámarksrefsing við meintum brotum mannsins er 16 ára fangelsi samkvæmt almennum hegningarlögum. Maðurinn er samkvæmt ákæru sakaður um að hafa gerst brotlegur við sex greinar hegningarlaganna þar á meðal 1. málgrein 202. greinar, sem er svohljóðandi:
„Hver sem hefur samræði eða önnur kynferðismök við barn, yngra en [15 ára], skal sæta fangelsi [ekki skemur en 1 ár og allt að 16 árum]. [Lækka má refsingu eða láta hana falla niður, ef gerandi og þolandi eru á svipuðum aldri og þroskastigi.] “
Héraðssaksóknari krefst þess að maðurinn verði dæmdur til refsingar og greiðslu alls sakarkostnaðar.
Faðir stúlkunnar gerir fyrir hönd ólögráða dóttur sinnar kröfu um miskabætur upp á fimm milljónir króna.
Aðalmeðferð í málinu verður á mánudag fyrir Héraðsdómi Reykjavíkur og stendur yfir allan daginn. Hinn ákærði mun fyrst gefa skýrslu, stúlkan mun einnig gefa skýrslu fyrir dómi, auk þess sem leiddir verða fram sérfræðingar til skýrslugjafar, meðal annars sálfræðingar. Þinghaldið er lokað.
Búast má við því að dómur falli í málinu um miðjan júní.
