Rússar hafa undirbúið sig undir gagnsóknina í vetur og hafa sett upp varnarlínur, grafið skotgrafir og sett upp hindranir sem eiga að hemja för skriðdreka.
Úkraínumenn hafa fengið mikið magn vopna frá vestrænum bandamönnum sínum, þar á meðal skriðdreka og langdræg flugskeyti. Þeir hafa myndað átta stórfylki vel þjálfaðra hermanna, sem margir voru í þjálfun hjá vestrænum bandalagsríkjum í vetur, sem eiga að vera í fararbroddi gagnsóknarinnar. Hvert stórfylki ræður yfir fjölda vestrænna skriðdreka. Í heildina eru um 40.000 hermenn í stórfylkjunum átta. Þessu til viðbótar hafa þeir myndað níu stórfylki minna þjálfaðra hermanna sem munu fylgja í kjölfarið og sjá um að tryggja yfirráðin á þeim svæðum sem verða frelsuð úr höndum Rússa. Með þessu geta hin stórfylkin haldið sókn sinni áfram.
Margir Rússar hafa áhyggjur af yfirvofandi sókn Úkraínumanna, þeirra á meðal eru rússneskir ráðamenn. Rússneska ríkisstjórnin hefur undirbúið rússneska fjölmiðla, sem eru hliðhollir stjórnvöldum, undir hvernig þeir eiga að flytja fréttir af sókn Úkraínumanna.
Um fjölda „ráðlegginga“ er að ræða að sögn óháða rússneska miðilsins Medusa, sem er staðsettur í Lettlandi.
Medusa hefur komist yfir afrit af „ráðleggingunum“ og segir að aðalboðskapur þeirra sé að undirbúa eigi rússnesku þjóðina undir umfangsmikla gagnsókn Úkraínumanna sem muni njóta stuðnings NATO.
Blaðamenn, sem eru hliðhollir stjórnvöldum, „eiga ekki að draga úr þeim væntingum sóknarinnar, sem er studd af NATO, sem Úkraínumenn hafa boðað“ né gefa í skyn að Úkraína „sé illa undir gagnsóknina undirbúin“ segir í „ráðleggingunum“.
Hins vegar eiga rússnesku fjölmiðlarnir að leggja áherslu á að Vesturlönd séu mjög tengd gagnsókninni vegna vopnasendinga sinna til Úkraínu og annars stuðnings.
Medusa segir að þessar „ráðleggingar“ eigi að auðvelda stjórnvöldum og fjölmiðlum að útskýra fyrir rússnesku þjóðinni að Rússar hafi tapað stríðinu og ef þeir sigri þá verði hægt að gera enn meira úr sigrinum en ella.
