Það fóru þrír leikir fram í Lengjudeild karla í kvöld.

Afturelding tók á móti Þór í Úlfarsárdal. Verið er að skipta um gras á heimavelli þeirra í Mosfellsbæ.

Um frekar lokaðan leik var að ræða þar sem Afturelding stýrði leiknum en tókst ekki að skapa sér mörg færi. Bæði lið fengu þó ákjósanlegar stöður til að komast yfir.

Það var hins vegar Afturelding sem hirti öll stigin í kvöld. Eina mark leiksins skoraði Gunnar Bergmann Sigmarsson með glæsilegum skalla á 89. mínútu leiksins.

Afturelding 1-0 Þór
1-0 Gunnar Bergmann Sigmarsson

Leiknir tók þá á móti Selfossi í afar skemmtilegum leik.

Daníel Finns Matthíasson kom Leiknismönnum yfir á 13. mínútu en 10 mínútum síðar jafnaði Jón Vignir Pétursson fyrir gestina.

Guðmundur Tyrfingsson kom Selfyssingum svo yfir snemma í seinni hálfleik.

Eftir tæpan klukkutíma leik var staðan orðin 1-3 þegar Valdimar Jóhannsson skoraði.

Ólafur Flóki Stephensen minnkaði muninn skömmu síðar en þar við sat. Lokatölur 2-3.

Leiknir 2-3 Selfoss
1-0 Daníel Finns Matthíasson
1-1 Jón Vignir Pétursson
1-2 Guðmundur Tyrfingsson
1-3 Valdimar Jóhannsson
2-3 Ólafur Flóki Stephensen.

Loks sótti Grótta gott stig til Grindavíkur í bragðdaufum leik.

Grindavík 0-0 Grótta