Carlos Tevez virðist hafa pirrað hluta stuðningsmanna Manchester United með ummælum sínum á dögunum.
Tevez er fyrrum leikmaður liða á borð við Manchester City, Juventus og einmitt Manchester United. Hann lagði skóna á hilluna árið 2021.
Tevez raðaði inn mörkum fyrir United frá 2007 til 2009 áður en hann fór til Manchester City. Féll það eðlilega alls ekki vel í kramið hjá stuðningsmönnum rauða liðsins í borginni.
Á dögunum var Tevez að ræða Alejandro Garnacho, afar spennandi Argentínumann hjá United. Tevez er líka frá Argentínu.
„Garnacho er mjög góður. Til að spila fyrir Manchester United þarftu að vera það,“ sagði Tevez um hinn 18 ára gamla Garnacho, sem hefur heillað með United þrátt fyrir ungan aldur.
„Hann er að spila fyrir eitt af þremur stærstu félögum heims. Það eru Real Madrid, Manchester City og United. Það er ekki auðvelt að koma þér inn í þessa menningu. Þú þarft að vera harður.“
Ummælin um að City sé eitt af þremur stærstu félögum heims fóru vægast sagt illa í hluta stuðningsmanna United sem nú láta hann heyra það.
