Íþróttavikan er komin á fulla ferð á 433.is og í Sjónvarpi Símans. Helgi Fannar Sigurðsson og Hrafnkell Freyr Ágústsson sjá um þáttinn og fá þeir til sín góða gesti alla föstudaga. Í þetta skiptið voru þeir Andri Geir Gunnarsson og Vilhjálmur Freyr Hallsson úr hlaðvarpinu Steve Dagskrá gestir.

Arsenal á enn von á Englandsmeistaratitlinum eftir frábæran sigur á Newcastle um síðustu helgi. Liðið er stigi á eftir Manchester City. Síðarnefnda liðið á þó fjóra leiki eftir en Arsenal aðeins þrjá.

„Ég samgladdist Arsenal mönnum mjög eftir leikinn við Newcastle. Það birti til hjá þeim. Þeir sáu að City ætti tvo leiki við Real Madrid. Vonin kom aftur. Ég hafði gaman að því fyrir þeirra hönd,“ sagði Andri í þættinum, en nóg er að gera hjá toppliði City í Meistaradeildinni.

„En líklegast er það bara til að brjóta þá aftur,“ bætti Andri hins vegar við um stuðningsmenn Arsenal.

Umræðan í heild er hér að neðan.