Skólameistari Menntaskólans á Akureyri hefur beðið fyrrverandi nemanda skólans afsökunar en hann neyddist til að hætta þar námi vorið 2021 vegna sögusagna og alvarlegra ásakana sem reyndust ekki eiga sér stoð í raunveruleikanum. Ásakanirnar og söguburðurinn fylgdu nemandanum í MH þar sem hann hóf nám eftir dvölina í M.A. og var nafn hans krotað á spegil í Metoo átaki í skólanum.
Afsökunarbeiðni skólameistara M.A. til nemandans fyrrverandi er birt á vef skólans en RÚV greindi einnig frá málinu.
Í tilkynningu skólameistara segir:
„Menntaskólinn á Akureyri hefur unnið með mál fyrrum nemanda skólans sem neyddist til að hætta námi vorið 2021 vegna sögusagna og alvarlegra ásakana. Þegar samskonar ásakanir komu upp í Menntaskólanum við Hamrahlíð í haust gagnvart sama nemanda voru þær skoðaðar af ráðgjafarhópi á vegum mennta-og barnamálaráðuneytis og reyndust ekki eiga sér stoð í raunveruleikanum.
MA lítur málið alvarlegum augum enda hafa þessar sögusagnir haft afdrifaríkar afleiðingar fyrir umræddan nemanda. Af hálfu skólans er hann beðinn afsökunar á að ekki hafi tekist að rétta hlut hans meðan á námi hans stóð í MA og standa vörð um hans rétt.“
