Þeirri kjaftasögu var skellt fram í hlaðvarpinu Dr. Football í dag að Heimir Hallgrímsson hafi í apríl rúntað um Bretland með einn frægasta íþróttamann allra tíma með sér.
Heimir er þjálfari Jamaíka en mikið af leikmönnum sem eiga ættir að rekja til Jamaíka spila í ensku úrvalsdeildinni.
„Veistu hvað Heimir var að gera í síðasta mánuði?,“ sagði Hjörvar Hafliða í þætti sínum í dag.
Hefur Hjörvar heyrt þá sögu að Usain Bolt, fljótasti maður allra tíma sem er frá Jamaíka hafi verið með Heimi í för. Hafi þeir félagar verið að reyna að sannfæra leikmenn um að spila fyrir Jamaíka.
„Hann var að rúnta um England, annar hver leikmaður í ensku deildinni getur spilað fyrir Jamaíka. Hann var að rúnta með Usain Bolt með sér, ég sel þetta ekki dýrara en ég keypti það samt.“
„Svona á að gera þetta, hann var með Usain Bolt með mér,“ segir Hjörvar.
