Lionel Scaloni, landsliðsþjálfari Argentínu, segist alveg sama um það hvert Lionel Messi fer næst svo lengi sem hann verði ánægður.

Hinn 35 ára gamli Messi hefur mikið verið í umræðunni undanfarið. Það er orðið ljóst að kappinn yfirgefur Paris Saint-Germain þegar samningur hans rennur út í sumar.

Messi hefur verið sterklega orðaður við Al Hilal í Sádi-Arabíu. Hann fengi langhæstu launin þar.

Þó hefur Barcelona, félagið sem hann neyddist til að yfirgefa sumarið 2021, einnig verið nefnt til sögunnar.

„Leyfið honum að fara þangað sem honum líður vel með liðsfélögum og stuðningsmönnum félagsins,“ segir Scaloni um stöðu mála.

Scaloni og Messi urðu heimsmeistarar saman með Argentínu í fyrra.

„Ákvörðun hans skiptir landsliðið engu máli svo lengi sem hann er glaður þegar hann kemur til móts við okkur. Við þurfum að hafa hann glaðan.“