Sala Glazer fjölskyldunnar á Manchester United gæti verið að færast nær ef marka má nýjustu fréttir.

Félagið hefur verið á sölu síðan í haust og hafa farið fram nokkrar „umferðir“ þar sem áhugasamir máttu leggja fram tilboð í félagið.

Sir Jim Ratcliffe og Katarinn Sheikh Jassim hafa leitt kapphlaupið um það að eignast United.

Nú segir breska götublaðið The Sun að Ratcliffe sé sá sem Glazer bræðurnir Avram og Joel vilji sjá eignast félagið.

Það er töluverður munur á tilboðum Jassim og Ratcliffe. Jasssim vill eignast allt félagið en Ratcliffe aðeins 50%.

Eignist Ratcliffe félagið myndu Avram og Joel halda sínum hlut í félaginu en aðrir meðlimir Glazer fjölskyldunnar myndu selja sinn hlut. Ratcliffe ætti því stærstan hlut í félaginu.

Þetta hugnast ekki öllum stuðningsmönnum United, enda Glazer fjölskyldan afar óvinsæl á meðal þeirra.

Hæsta tilboðið í United hingað til kom frá Jassim. Það hljóðaði upp á 5 milljarða punda. Glazer bræður telja tilboð Ratcliffe í 50% félagsins þó meira virði, en sjálfir hafa þeir beðið um 6 milljarða punda fyrir United.