Pep Guardiola vill sjá Lionel Messi snúa aftur til Barcelona og kveðja félagið almennilega.

Messi hefur mikið verið í umræðunni undanfarna daga eins og allir hafa tekið eftir. Það er orðið ljóst að kappinn yfirgefur Paris Saint-Germain í sumar.

Mest hefur verið talað um Al Hilal í Sádi-Arabíu í tengslum við næsta áfangastað Messi. Faðir leikmannsins steig hins vegar fram í gær og sagði ekkert til í orðrómum um að hann hafi þegar samið þar.

„Ég er stuðningsmaður Barcelona. Ég á ársmiða á vellinum og ég vona að einn daginn getum við kvatt hann á þann hátt sem hann á skilinn. Hann er besti leikmaður allra tíma,“ segir Guardiola.

Messi yfirgaf Börsunga sumarið 2021 vegna gríðarlegra fjárhagsvandræða félagsins.

„Ég hefði aldrei trúað að þetta myndi enda eins og það gerði. Ég er viss um að Joan Laporta forseti elski Leo. Síðan Messi fór hefur hann (Laporta) sagt að hann eigi skilið að fá almennilega kveðjustund vegna alls sem hann gerði fyrir félagið.“

Guardiola, sem er í dag stjóri Manchester City, stýrði Messi áður hjá Barcelona og náðu þeir stórbrotnum árangri saman.

„Leo hjálpaði félaginu okkar að verða mun stærra en það var áður en hann kom. Þegar einhver er svona stór persóna verður þú að kveðja á réttan máta. 

Hann fór vegna mjög erfiðrar fjárhagsstöðu, vegna alls konar ástæðna sem ég ætla ekki að ræða hér.

Ég vona að það komi að þeim degi sem ég stend upp úr sæti mínu á Camp Nou og klappa fyrir Leo, kveð Leo eins og hann á skilið. Ég veit að Joan mun reyna og Leo líka. Hann og hans fjölskylda munu fá að upplifa alla ástina sem stuðningsmenn Barcelona bera til þeirra.“