Bæjarstjórn Kópavogs hefur tekið ákvörðun um að rifta verksamningi við ítalska verktakafyrirtækið Rizzani de Eccher vegna byggingar nýs Kársnesskóla, en meirihlutinn í bæjarstjórn samþykkti riftunina á fundi sínum í gær.

Morgunblaðið greindi frá málinu  en samkvæmt heimildum miðilsins hafi myglusveppur greinst í ókláraðri byggingunni, og nýir gluggar lekir. Ásdís Kristjánsdóttir, bæjarstjóri Kópavogs, sagðist ekki geta tjáð sig um smáatriði málsins en að upp hefðu komið gallar á unnu verki verktakans og fullnægjandi úrbótum hafi ekki verið sinnt þrátt fyrir ítrekaðar áskoranir þar um.

Bygging nýs Kársnesskóla hófst í kjölfar þess að eldri bygging við Skólagerði var rýmd vegna rakaskemmda og myglu en húsið var dæmt ónýtt og rifið í byrjun árs 2019. Niður­stöður útboðs um nýju bygg­ingu skól­ans voru kynnt­ar í fe­brú­ar árið 2021 en þar átti áðurnefnt verktakafyrirtæki naumlega lægsta boð, 3,2 milljarða, á undan Ístaki og Íslenskum aðalverktökum sem buðu 3,24 og 3,28 milljarða í bygginguna. Kostnaðaráætlun verksins hljóðaði upp á 3,7 milljarða.

Bæjarfulltrúar Pírata, Samfylkingar og Viðreisnar í minnihluta bæjarstjórnar mótmæltu riftuninni. Í bókun sem þau lögðu fram á fundinum í gær segir:

„Riftun getur haft í för með sér umtalsverða röskun á byggingu nýs Kársnesskóla. Bæði geta orðið tafir á verkinu auk þess sem kostnaður mun að öllum líkindum aukast, enda er líklegt að dýrara sé að fá aðra verktaka til verksins. Þá hafa verktakaskipti almennt neikvæð áhrif á ábyrgð á gæðum verksins, sem verður óskýrari eftir því sem fleiri koma að því. Verktaki hefur í samskiptum sínum við Kópavogsbæ haldið fram vanefndum bæjarins og gert kröfu um framlengingu á verktíma og bætur vegna þess. Undirritaðar telja mikilvægt að leita allra leiða til að ná samningum við núverandi verktaka um að ljúka verkinu.“ 

Fulltrúar Samfylkingar og Pírata sátu hjá en fulltrúi Viðreisnar hafnaði tillögunni um riftun.

Á vettvangi bæjarráðs Kópavogs var bókað um málið að mikilvægt væri að bregðast við „alvarlegri stöðu sem upp er komin í framkvæmd nýs Kársnesskóla“. Ekki verði lengur unað við alvarlegar og viðvarandi vanefndir aðalverktaka og hafi ítrekaðar áskoranir um að koma verkinu á réttan kjöl ekki borið árangur og færu vonir um að verkið yrði klárað með fullnægjandi hætti þverrandi. Því væri óhjákvæmilegt að grípa til nauðsynlegra aðgerða til að koma verkinu í horf.

Þeir sem samþykktu riftun í bæjarstjórn gerðu bókun á móti bókun fulltrúa Samfylkingar, sem er sambærileg að efni til og bókun sem gerð var í bæjarráði.