Ína Berglind Guðmundsdóttir vann Söngkeppni Samfés,sem fram fór í gær, með frumsamið lag Tilgangslausar setningar. Ína Berglind kemur úr félagsmiðstöðinni Nýjung á Egilsstöðum.

Í öðru sæti var Arnbjörg Hjartardóttir úr félagsmiðstöðinni Boran með lagið Við tvö, sem einnig var frumsamið. Í þriðja sæti var hljómsveitin Slysh úr félagsmiðstöðinni Skjálftaskjól með lagið Home Sweet Home.

Dómnefndina skipaði Þórdís Björk Þorfinnsdóttir leik- og söngkona, og tónlistarfólkið Júlí Heiðar Halldórsson, Guðlaug Sóley Höskuldsdóttir  (Gugusar) og Klara Ósk Elíasdóttir.

Samfestingurinn, tveggja daga hátíð Samfés – Landssamtaka félagsmiðstöðva og ungmennahúsa á Íslandi, fór fram nú um helgina í Laugardalshöllinni. Um  7.500 ungmenni úr félagsmiðstöðvum alls staðar á landinu sóttu hátíðina. Á föstudag var haldið ball og í gær var söngkeppnin.