Ingólfur Árni Gunnarsson, framkvæmdastjóri Ölmu leigufélags, segir að útburður á leigjendum sé sjaldgæfur og meira þurfi að koma til en tveggja mánaða leiguskuld til að leigjandi sé borinn út. Vísir greinir frá þessu.
Við greindum frá því í vikunni að 79 ára gamall maður, Ólafur Ögmundsson, og fatlaður sonur hans sem notast þarf við hjólastól, voru bornir út úr leiguíbúð í eigu Ölmu við Hátún, með atbeina sýslumanns og lögreglu.
Ólafur sagði við DV að hann hefði lent tvo mánuði á eftir með leiguna í kjölfar þess að hann veiktist hastarlega af Covid í ferð til Spánar. Hann hafi hins vegar greitt leiguna marga undanfarna mánuði.
Ingólfur hjá Ölmu segir í viðtali við Vísi:
„Þetta ferli er þungt og erfitt fyrir alla aðila sem koma að málinu og því allra síðasta úrræði sem leigusalar leita til.“
Hann segist ekki geta tjáð sig um einstök mál en að meira þurfi að koma til en tveggja mánaða vanskil á leigu til að leigjandi sé borinn út:
„Það má einnig taka fram að þegar svona mál eru komin í útburðarferli þá er af og frá að upphæð skuldar nemi aðeins tveggja mánaða leigu. Svona ferli teygir sig yfir margra mánaða tímabil og kostnaður og ógreiddar skuldir eftir því.“
Ólafur greindi frá því að Umboðsmaður skuldara hefði staðfest með bréfi til Ölmu að skuldin yrði greidd en það hefði ekki breytt ákvörðun leigufélagsins um útburð.
