„Ansi gagnlegt myndband og því miður orðið ansi algengt að fólk ofskammti af þessum lyfjum, sérstaklega unga fólkið okkar. Við erum með Naloxone í bílunum hjá okkur og við öllu búin,“ segir í færslu lögreglunnar á Suðurnesjum.

Deilir lögreglan þar myndbandi þar sem kennt er hvernig bregðast á við í þessum aðstæðum. Rétt viðbrögð geta bjargað mannslífi.

@fannarfreyratlason Lærðu að gefa naloxone með sjúkraflutningamönnum #overdozeawareness #fyp #ofskömmtun #naloxone #narcan ♬ Calm LoFi song(882353) – S_R

Hvað er Naloxone?
Naloxone er mótefni gegn ópíóíðum/morfínlyfjum, eins og Contalgin, Oxycontin, Fentanyl og Heróín. Ópíóíðainntaka yfir þolmörk getur valdið öndunarstoppi, Naloxone getur snúið því ástandi við. Enginn skaði fylgir því að gefa lyfið sé þess ekki þörf og því er betra að gefa það ef maður er í vafa.

Naloxone kemur ekki í stað bráðaþjónustu og því er mikilvægt að hringja alltaf í 112 þegar ofskömmtun af völdum ópíóíða á sér stað. Naloxone virkar aðeins í um 30 mínútur og því geta einkenni komið aftur ef aðstoð er ekki komin. Í nefspreyinu er einn skammtur og er það notað á sama hátt og venjulegt nefsprey. Ef ekkert gerist á þremur mínútum getur þú gefið annað skot, en tvö nefsprey eru í hverri pakkningu.

Hver eru einkenni ofskömmtunar?
Hæg öndun, meðvitundarskerðing, sjáöldur verða pínulítil, þú veist af ofskömmtun eða einhver á staðnum segir þér frá henni.

„Við hvetjum að sjálfsögðu þá sem lenda í þessum aðstæðum að vera ekki hrædd við að hringja í 1-1-2 komi til ofskömmtunar hjá einhverjum í kringum ykkur.“

Hægt er að nálgast ókeypis Naloxone nefúða hjá Frú Ragnheiði á höfuðborgarsvæðinu, Suðurnesjum og Akureyri. Öll velkomin að hafa samband og er fullri nafnleynd heitið.
Frú Ragnheiður höfuðborgarsvæði – S: 7887-123
Frú Ragnheiður Suðurnes – S: 783-4747
Frú Ragnheiður Akureyri – S: 800-1150